Wednesday, July 09, 2008

الثغرة



سدوا الثغرة خلاص
..........
استمعت إلى حلقة من برنامج البيت بيتك فى التليفزيون المصرى ( 8 – يوليو – 2008 ) - على الرغم من أن التليفزيون المصرى غير جذاب فى ظل انتشار الفضائيات المتخصصة فى مختلف المجالات إلا إن الإعلام الحكومى يعطيك قدر من الإضاءة على خطة النظام للتعامل معنا نحن العبيد.- .. كان المذيع تامر أمين والضيوف نقيب الأطباء وعميد كلية طب القاهرة أو عين شمس لا أذكر
. كان موضوع الحلقة عن تقليل أعداد المقبولين فى كليات الطب لكى تستطيع الجامعات تخريج أطباء على مستوى عالى من المهارة حيث أنه فى ظل الأعداد الكبيرة الحالية والتكدس فى أعداد الطلاب لا تستطيع الجامعات التركيز على إكساب الطلاب الخبرات المطلوبة والمهارات اللازمة وإعطائهم تعليم أكاديمى وعملى على المستوى المطلوب
فى ظل توافق تام من المذيع والضيوف كان النقاش يسير بصورة سلسلة جيدة جداً مع وجود مداخلات من بعض المواطنين ودكتورة ممثلة للمجلس الأعلى للتعليم الجامعى المسئول عن تحديد أعداد الطلاب المقبولين للجامعات

..........
بصراحة اتخنقت
.........
تصوير الأمور بطريقة مقلوبة فى سنواتنا الخداعات تللك
حيث يُصور الباطل على أنه حق ويُصور الحق على أنه باطل ... ويستخفون بعقول الناس
...بدلاً من أن يعترفوا بفشلهم فى إدارة شئون البلاد والعباد ... يطالبون الناس بعدم التكالب على تعليم ابنائهم والسعى الدؤوب لإلحاقهم بالتعليم الجامعى وكليات القمة الطب والصيدلة والهندسة وغير ذلك ... واقترحوا أن تزيد درجات تنسيق المرحلة الإعدادية المؤهل للإلتحاق بالثانوية العامة لكى تقل الأعداد المُلتحقة بالثانوية العامة من الأساس ونُخففها بعد ذلك بصعوبة الإمتحانات فى الثانوية العامة
.....
هذا النظام الذى يُنفق معظم ميزانيته على الأجهزة الأمنية لتأمين وجوده هذا النظام الفاشل فى إدارة شئون بلده
لا يُريد أن يتوسع فى إنشاء جامعات جديدة وكليات طب جديدة
بل يطلب مننا أن نشيل موضوع الجامعة ده من دماغنا
يسرق مننا الحلم حتى بتعليم ابناؤنا

ويقول نقيب الأطباء المحترم أن مرتب الطبيب حديث التخرج لا يتعدى 200 جنيه ... يبقوا عاوزين يبقوا دكاترة ليه .. دا الكهربائى بيكسب أكتر من الدكتور
......
استعباط ما بعده استعباط

بدلا من أن تزودوا المرتبات .. تقولوا بلاش تحلموا بالجامعات واشتغلوا صنايعية أحسن .. عمال وفلاحين ... وسيبكوا من التعليم الجامعى ده .. التعليم دلوقتى للقادرين عليه ... الجامعات الخاصة دى مفتوحة لمين يعنى
.......
هوه ده مربط الفرس.... التعليم لولاد الناس الأكابر .. أما الرعاع ولاد الكلب ما يحاولوش يخرجوا من توبهم وتوب أهاليهم ... وعيش يا ابنى عيشة أهلك ....خليك نجار واللا سباك واللا حداد واللا زبال .. واللا اشتغل عربجى واللا سواق توك توك ... واللا بيع أنابيب غاز ...واللا عامل زراعى ... أو عامل فى محطة بنزين ..أو هوم ديليفرى .. والبقشيش كويس أوى .. وهنشوفك ..
الثغرة خلاص سدوها
... الثغرة اللى نفذ منها جمال عبد الناصر ( الله يرحمه ) ورفاقه الذين قاموا بثورة يوليوا ونشروا مجانية التعليم وأتاحوا الطفرة التعليمية الهائلة فى مصر وأنشاؤا المصانع .. مصانع حديد حلوان ومصانع الغزل والنسيج والسد العالى وغير ذلك .... اللى خلاص بتتخصخص وتتباع
....
الثغرة دى خلاص اتقفلت
... مش هيسمحوا لحد من الرعاع أنه يوصل تانى ويهدد عروش السادة الجدد .. الإقطاعيون الجُدد
يجب علينا نحن الرعاع أن ننسى الماضى ...
ننسى بقى أن النظام يعلمنا ويشغلنا ويعالجنا ويأكلنا ويشربنا ... لازم نتحمل مسئولية أنفسنا
..
ووقفة مصرية

قبل ما نزيد مولود نتأكد إن حقه علينا موجود
وبلاش نفكر فى الجواز والخلفة أساساً

ومساء الفل على الفكر الجديد